يعرض الآن

Borderland-John Mark Mcmillan
ﺍﺳﺘﻤﻊ ﻟﻠﺒﺚ ﺍﻟﻤﺒﺎﺷﺮ

التعليم في المدينة القديمة

راديو الحياة متحدثا الى صليبا خطاب

Read in English

راديو الحياة قابل صليبا كتاب من مدرسة الفرير القدس و صليبا احكيلي شو هي مدرسة الفرير ؟

 

مدرسة الفرير هي مدرسة تابعة للأخوة الربانية اللي تابعين للقديس حنا دي لاسال كان تأسيس هاي المدرسة في فرنسا اساسها كان لمساعدة تعليم الفقراء وكانت هي المدرسة باهتمام الراهب القديس يوحنا دي لاسال بالناس الفقراء وبنفس الوقت الدورة صارت للطلاب وللجميع ولكل الطلاب اللي بحبوا يدرسوا في هاي المدرسة.

 

هل في عندكم مدارس حوالين العالم؟

 

طبعا في عنا مدارس في العالم كلها في عنا مدارس في 40 دولة موجود كمان في جامعات في بعض الدول.

 

كيف تم تأسيس هاي المدرسة ومتى تم تأسيسها؟

 

مدرسة الفرير في القدس تأسست عام 1876م عن طريق اخوين فرنسيين اجو من فرنسا و اجتهم الفكرة انهم يبلشوا في أول مدرسة في الاراضي المقدسة اللي هي كانت مدرسة الفرير عن طريق ارض اعطيت للفرارية من البطريركية اللاتينية.

 

انت كنت طالب على نحو 50 سنة في هاي المدرسة وهلا انت المدير بتقدر تحكيلنا شو شعورك لهاد الإشي؟

 

مزبوط انا خريج هاي المدرسة درست فيها وانا صغير من عمر 5 سنين لأنه كنا عايشين قريبين من هاي المدرسة ومعظم طلاب مدرسة الفرير كانوا عايشين في البلدة القديمة وكانت كتير سهلة لأنه ما كان في مواصلات وما كان في طرق وكانت المدرسة قريبة على الدور تبعتنا وبعض مرات كنا نلعب فيها كرة سلة وكرة قدم وهاي الشغلة خلتنا يكون عنا إحساس بالانتماء لهاي المدرسة بعدين لما تخرجت من المدرسة سافرت لفرنسا تخصصت بالتربية والتربية الرياضية ورجعت أستاذ بعدين مسؤول وهلا الحمدلله كنت ولا إشي وهلا صرت مسؤول عن المدرسة هاي.

 

اكيد شفت كتير من التغيير على المدرسة هاي؟

 

في تغييرات كتير صارت عن طريق السنين لأنه الدنيا صارت تتطور بس بنفس الوقت بحس انا انه التعليم في المناطق خصوصا في الشرق الاوسط التعليم تقليدي مش الكل بحاول يشوف تطوير وتحسين للتعليم في المنطقة وان شاء الله الله يوفقني يكون في تطوير بجدية بمدرستنا خصوصا ادخال التكنولوجيا في التعليم اللي راح يساعد كتير من طلابنا يغير نمط حياتهم في المدرسة تبعتنا.

 

كل اشي بتغير مع الزمن هل التكنولوجيا بتأثر على التعليم؟

 

اكيد يعني التكنولوجيا مش سهل ومش صعب هلا طلابنا كلهم وأولادنا بعرفوا في التكنولوجيا اكتر من المعلمين يعني بخلي نوع من المنافسة الموجودة المعلمين لازم يكونوا على قدر الإمكانية انه يكونوا عندهم القدرة على ادخال التكنولوجية في التعليم وهاد الإشي منشتغل عليه وان شاء الله نتوفق فيه.

 

انا فهمت انك بدك تحط هون في المدرسة زي إذاعة للطلاب؟

 

اكيد مدرسة يكون فيها محطة راديو كتير مهم لإلي بشوف أنه كتير مهم يكون في للطلاب شخصية ويكون في مسؤولية بتحضير البرنامج للراديو هاد وهو عبارة عن راديو صغير في المدرسة وينبث لمدة 24 ساعة والولاد يتعلموا على التقنيات الحديثة ويكون عندهم شخصية لما يحكوا قدام المايكروفون ويعطوا أفكار جديدة للأمور اللي بفكروا فيها.

 

هل بدكم الأطفال انهم يقوموا بنفسهم بتطوير برامجهم كالموسيقى وغيرها؟

 

أكيد لأنه المدرسة مش بس مكان للدراسة المدرسة كمان هي مكان انه أنمّي للكل الطموحات اللي عند الطالب تبعنا وكل الاشياء اللي بحبها في حياته وأكيد في عندهم هوايات أولادنا وهاد لازم إنميهم من غير برامج اللي بتكون زايدة عن التعليم في المدرسة مش راح تصير بس تقدر توصل الرسالة تبعتها فإعطاء الفرص لطلابنا لأنه يمارسوا هواياتهم داخل المدرسة بعد الدوام المدرسي وهاد بساعد كتير ومدرستنا الحمدلله عم بتقوم بهاد الواجب لأنه إحنا بنآمن بوجود النشاطات المجتمعية داخل المدرسة.

 

هل هاد الإشي مميز للأراضي المقدسة؟

 

اكيد يعني في كتير مدارس عندهم النشاطات اللامنهجية وفي عندهم كمان الاذاعات الصباحية ونحنا نفس الاشي في عنا اذاعة صباحية عشان هيك بدي اطور الموضوع وما يكون بس اذاعة صباحية ولكن يكون في اذاعة 24 ساعة والطلاب يهتموا لأنه أكيد راح يطلع طلاب اللي يقدروا يستغوها كمهنة في المستقبل ويا ريت في مدارس تانية اذا زبطت في مدرستنا إن شاء الله يتبنوا مشاريع للطلاب.

 

شو هي مهمتك هون؟

 

الرسالة تبعتنا هيا الاهتمام بالطفل ونوصله لبر الأمان وفي عنا طلاب مسيحية ومسلمين وهاي الشغلة لا غنى في مدرستنا لأنه بتعطي الطالب يكون في عنده فتح على الأخر وبنات او حتى يصير يحترم الأخر بلونه وبديانته وهاد إشي مهم والشغلة التانية كمان انه طلابنا يسيروا في بر الأمان من ناحية دراسة ومن ناحية تعليم ويكون عندهم شخصية يقدروا يعاركوا المشاكل الموجودة في المجتمع.

 

قديش عدد الاطفال في المدرسة؟

 

في عنا في مدرسة الباب الجديد 60 طالب واغلبه بنات وبيت حانينا عنا تقريبا 1100 طالب وطبعا في طلاب مسيحية ومسلمين وهاد المهم وما في احساس لشخص يكون غريب عن الأخر دائما الطلاب بحسوا حالهم كعائلة وحدة كأنهم شخص واحد بتعاملوا بمحبة واحترام.

 

هل انتم مدرسة مختلطة؟

 

احنا مدرسة مختلطة من شي 15 سنة وهالفكرة كانت في الماضي وتندرس لفترة طويلة وأخذنا القرار يكون في عنا مدرسة مختلطة لأنه احنا بنآمن بالاختلاط اللي بيعطي انفتاح للطلاب الموجود عنا او للطالبة.

انتم مدرسة مسيحية هل عندكم طلاب مسيحية ومسلمين وبتعايشوا مع بعض؟

 

اكيد حكيت قبل في هاد الموضوع ولكن بنحترم الديانات الأخرى في الاحترام حتى بتعطي الحق لكل شخص مسيحي او مسلم اللي بقدر يمارس الديانة تبعته بكل حرية ويحترم الديانة الاخرى من غير اي مشكلة.

 

هل تدريس الثقافة المسيحية إشي مهم للمدرسة؟

 

هي مدرسة مسيحية أكيد والراهبات مسؤولين عنها فأكيد الديانة المسيحية شيء مهم طبعا ما منقدر إحنا نضغط على الطلاب المسلمين انه يتعلموا الديانة هاي ولكن هي ديانة فقط للمسيحية وبنفس الوقت الطلاب المسلمين بمارسوا وبتعلموا الديانة الإسلامية مثل أي مدرسة تانية ما في مشكلة.

 

هل انت مركزك عند الباب الجديد في القدس ممكن يكون مركز جديد في حد ذاته يكون مركز المدرسة احكيلنا اكتر عن الموقع وشو بمثل بالنسبة للمدرسة؟

 

وجودنا بمكان في مدرسة الفرير في الباب الجديد يعني برايي اشي كتير كبير واشي ثمين لأنه كل الأماكن المقدسة موجودة حوالينا مش بحاجة نستخدم مواصلات أو نستخدم إشي نوصل لهاي الأماكن ولكن إحنا منفكر في البرنامج المزبوط السنة الجاي انو ندخل منهاج زيارة البلد القديمة من صف تمهيدي لصف 12 اللي الطالب يكون مسلح بمعلومة تاريخية ومعلومات عن البلد القديمة اللي نحنا يمكن في عنا لما كنا عايشين في البلد ولهلا عايشين ما منعرف القدس هيئة وما منعرف عنها إشي كتير فهاي انا بشوفها فرصة لاولادنا إنهم يبلشوا يتعرفوا ويعرفوا عن الاماكن المقدسة وتاريخها اللي يكونوا مسلحين في المستقبل ويمكن كمان يكون عندهم ميول ليكونوا مرشدين سياحيين اللي إحنا منقدر نقوم فيها.

 

هل عندك كتير من النشاطات الغير منهجية؟

 

مدرستنا معروفة وما بدي اتم اقول فيها وفيها يعني من كذا سنة كان المدراء فيها فرارية أو علمانيين كانوا كتير يشددوا على النشاطات اللامنهجية ومدارسنا المزبوط هاي جزء من المادة تبعتهم فالطالب مكانه المدرسة حتى بعد الدوام بقدر يمارس كل النشاطات والهوايات تبعته فمدارسنا فعلا في هاي الشغلة سباقة انا بشوف في مدارس تانية بسكروا مباشرة بعد الدوام ولكن مدارس الفرير دايما بتم فاتحة ابوبها للطلاب ليمارسوا كل النشاطات والهوايات وهاد بزيد الانتماء عند الطالب.

 

هل بتحدث فرق في حياة الطلاب في المدرسة؟

 

طبعا احنا منهتم في شخصية الطالب منهتم بكل ميولاته وهادي بتعطي للطالب انه يغير من حياته وبيجوا الطلاب على المدرسة مبسوطين وعادة الطلاب ما بحبوا المدرسة لأنها كتير شديدة ودائما في امتحانات كثير وفروض كثيرة والتعليم التقليدي هيك بتطلب واليوم التكنولوجيا دخلت في عالمنا في عالم الطالب وعالم المدارس فلازم نركز على هاد الموضوع وما نقحم الطالب بجهد كبير بعد المدرسة لأنه عم بقضي حوالي 6 ساعات في المدرسة يروح عل بيت كمان 4 او 5 ساعات دراسة هاد اشي بعطيه ارهاق كبير واهم إشي أنه الطلاب مش كلهم في نفس المستوى في طلاب ربنا معطيهم النعمة وفي طلاب تانيين عندهم ضعف وعندهم صعوبات دراسية المفروض احنا نهتم كثير بالكل فهاي هي مدرستنا اليوم إنها بتساعد الطالب ومنعطي مجال انه يحب المدرسة ونخلي عليه نشاطات بدراسة تكون سهلة له انه ما يدخل في عالم الحفظ والبصم اللي يقدر يستنتج الامور ويقدر يكتشفها بسهولة حتى يقدر يتعلم بالمدرسة.

 

شو هي صلاتك لمستقبل المدرسة؟

 

النظرة تبعتي للمدرسة في المستقبل اليوم إحنا منركز على التكنولوجيا ونكمل في تطوير المدرسة و المدرسة تقدر تخدم الطالب ويتخرج منها يكون عنده سلاح قوي بشخصيته وبثقافته واهم إشي في شغلة نسيتها كمان نركز على القراءة للطالب انه يكون مهم لأنه تسليح الطالب بالقراءة والثقافة بتعطيه القدرة يقدر بعد المدرسة يعارك الحياة في الجامعة وفي الحياة اليومية ، اليوم انا بشوف المفتاح الاول هو إدخال التكنولوجيا في التعليم وبدائل التقييم تتغير تبطل بس في الكتابة وتبطل بس في الاختبارات والامتحانات في وسائل وفي بدائل تانية موجودة هاي لازم نركز عليها حتى الطالب يكون مبسوط داخل المدرسة ويعمل كل النشاطات والهوايات اللي بحبها والمدرسة طبعا في هاي الطبيعة بتقدر تطور ونطور أولادنا.

More from اخبار الحياة

ﻗﺎﺋﻤﺔ ﺍﻟﻤﺮﺍﺳﻼﺕ

اتصل بنا

  • بريد الكتروني studio@radiohayah.ps
  • هاتف (970) 022777019