صوت راديو الحياة
راديو الحياه قابل لانا الزغبي من مؤسسة اليميمة.
لانا ما هي مؤسسة يميمة؟
هي مؤسسة لذوي الإعاقة فيها 3 برامج برنامج لبيت الداخلي فيه 24 طفل مقسمين حسب العمر وحسب الجندر، وعنا كمان مشروع المركز الصباحي (إيبر) الي بيجوا عليه لولاد من برا المؤسسة وداخل المؤسسة بتلقوا فيه علاج طبيعي وظيفي وتعليم، وفي عنا برنامج الوصول الي المنازل منساعد فيه 40 عيلة علاج طبيعي وخدمه اجتماعية.
كيف تأسست المؤسسة ؟
عام 1982 في كان تنين متزوجين ادوارد وهلينا اجو على المنطقة وشاوفوا انه في حاجه انه نعمل مؤسسة هون لذوي الإعاقة، وفتحوا بين شوي صغير وبعدين بلشت المؤسسة تكبر شوي لحد ما وصلنا لهون.
كم عدد الأطفال الذين تعتنون بهم؟
في البيت الداخلي في عنا 24 طفل وبالمركز الصباحي في عنا 35 طفل وفي الوصول للمنازل عنا 40 طفل.
هل يعيش الأطفال هنا في البيت؟
اه في عنا بالبيت الداخلي 24 ولد وهدول بعيشوا عنا 24 ساعه احنا امنهتم فيهم من جميع الجوانب الصحية والاجتماعية والنفسية والتعليمية.
هل يتواصلون مع عائلاتهم ؟
في علاقة مع العائلات وفي ناس مع عائلاتهم علاقتهم كتير كبيرة، وفي ناس علاقتهم مع عائلاتهم أضعف بس بتصلوا عليهم تلفونات وبسألوا عنهم من فترة لفترة، وفي عنا ولاد كتير مش معروف أهاليهم فما علاقة معهم.
هل لديكم مدرسة هنا ؟
في عنا زي مركز تعليمي مش مدرسه المركز التعليمي الي هوي الإعاقاات الموجود هي إعاقات شديده وبطئ تعلم فهمي بتعاملوا مع الولد حسب حاجاته التعليمية حسب ايش قدرات هذا الطفل وبنطلقوا منها.
مع كل الأشخاص ذوي الإعاقة هنا هل يحتاج الأطفال بعض الخدم للعلاج النفسي؟
اه معظم الأطفال الموجودين عنا بحتاجوا الي علاج طبيعي وفي كمان علاج وظيفي لأنه الأولاد الي عنا أكترهم ذوي احتياجات خاصة وإعاقات شديده وإعاقات بسيطة فبحتاجوا علاج طبيعي وعلاج وظيفي ليقدروا يحافظوا على نفس المستوى الي همي فيه أو يطوروا اشي بسيط.
إذن أنتم لا تقومون بحضانه الأطفال هنا بل تعتنون بحياتهم؟
احنا مؤسسة ابتهتم بالأشخاص من قبل الأشياء اليومية الي في حياتهم تطعيميهم ملابسهم امنهتم فيهم بشكل بسيط بس هلأ المؤسسة عم تتطور وعم منحاول نوصل أكتر لأنه تعطي المؤسسة أنشطه أكتر نعلمهم كيف يعتمدوا ع حالهم بتعلموا أشياء أكتر من هيك.
أنتم مؤسسة مسيحية فهل تعتنون فقط بالأطفال المسيحين أم أن المؤسسة تهتم بالأطفال من كلا الديانتين؟
ما عنا فرق بين مسيحين ومسلمين احنا الأساس هي مؤسسة مسيحية بس معظم الأطفال الموجودين مسلمين والمؤسسة لا تفرق بين الأطفال المسيحين والمسلمين ابتحترم كل الديانات، ومستعدين نعطي خدمه لأي شخص ممكن يلجأ لمؤسستنا.
لماذا هنالك الكثير من ذوي الإعاقه في هذه المنطقة؟
يمكن هناك الكثير من الأسباب لوجود أطفال ذوي إعاقة في المنطقة ربما أسباب جينية أو وراثية وممكن قلة وعي للأهل من ناحية التغذية والأهتمام بالأطفال الموجودين عندهم سواء خلال ولاده أو بعد الولاده أو ممكن أزواج أقارب ممكن في طبيعه المعيشة القاسية ما بتخلي الأهل واعيين كيف يتصرفوا إذا الولد مرض لأنه في كتير حالات لأطفال بكون الولد سخنان أو عندوا حاله مرضية ما بتابعوا الأهل منيح فممكن يسبب لشخص ذوي إعاقة وممكن قلة المؤسسات الي بتساعد هدول الأشخاص فبتتطور الإعاقة وممكن قلة المراكز الصحية الي بتساعد على تطور الطفل وعلاجه بشكل مناسب.
هل هناك حاجه لتغيير المجتمع هنا؟
بتخيل لازم يكون هون كتير وعي ويكون في مؤسسات تعمل على انه كيف اتوعي الناس حول أسباب الإعاقه بالبلد وبتخيل هاد دور الشؤون الاجتماعية ودور المراكز الحكومية وغير الحكومية كيف يوعوا الناس على شو أسباب الاعاقة لأنه عاده هاي المؤسسات ابتددخل بعد ما تصير الإعاقة وهي المفروض تتدخل قبل ما تصير الإعاقة مش بعد ما تصير.
هل هي عملية سهله العمل مع ذوي الإعاقه ؟
أكيد لأ مش سهل العمل مع الأشخاص ذوي الإعاقة لكثير أسباب لأنه الشخص ذوي الإعاقه عندو مشكلة لأنه كل التسهيلات الموجوده بالمجتمع ما بتساعد انه نتعامل مع هدول الأشخاص لأنه في كتير محلات مش مؤهلة ان كان حركية عقلية أو البيئة لأنه الأطفال يتنقلوا، هاد على مستوى مجتمع وكمان هيك قلة الخبرات والمعلومات فمش سهل نتعامل مع الاشخاص ذوي العلاقة فلازم يكون عنا كتير ابحاث وتطورات ومعلومات عشان انحسن في مستوى التعليم الي عنا، بس أنا في النهايه بحب أضيف انه المشكله مش بالأشخاص ذوي الاعاقة المشكله فينا احنا وبمجتمعنا لأنه مجتمع مش مؤهل للعمل مع الأشخاص ذوي الإعاقة لو المجتمع مؤهل والكادر مؤهل بكون أسهل في التعامل معهم .
هل هي عملية مجزية؟
أهم اشي في العمل مع الاشخاص ذوي العلاقة انك تفرجيهم انهم شخص مهم، زيهم زي التانين وانهم بتلقوا عطف وحب واهتمام منك لأنه في النهاية الحب هو عبارة عن كل شي وهوي الي بحسسك انك قادر تستمر وانه في حدا بهتم فينا وبرعنانا، بتمنى انه الفكرة ما تكون عطف عليهم أو حزن عليهم تكون حب وحنان زيهم زي أي شخص تاني بحتاج لحب وحنان.
ما هو التعامل مع الاشخاص ذوي الإعاقة في المجتمع ؟
أنا شايف كتير تطور كيف الناس ابتتطلع للاشخاص ذوي الاعاقة زمان كانوا منتهكه حقوقهم كانوا اكتر ما حدا بعطيهم اهتمامهم ومعتبرينهم خلف المجتمع هاد الحكي مش بس في منطقتنا، في حكام زمان اضطروا لقتل الاطفال ذوي الاعاقة لانه بالنسبه الهم غير منجزين وغير مفيدين، في المجتمع العربي كان زمان الأطفال ذوي الاعاقة عبء على الأهل لأنهم ما بقدروا يفيدوا المجتمع وبكونوا عالة على الاشخاص، لسه النظرة موجوده عند بعض الفئات بس في كتير تحسن الناس كلها عم تتطور، المجتمع المحلي والحكومة، بس لسه بتخيل بدنا سنين لحتى ننظر لهاي الفئة بطريقة كتير احسن.
هل تغييرون حياتهم؟
طبعا منحاول قدر الامكان انه نغير حياتهم، منحاول انأمنلهم التسهيلات اللازمه ليتنقلوا بالمناطق ويتنقلوا داخل المؤسسة ويعتمدوا ع حالهم أكتر الاشخاص ذوي الاعاقه الي موجودين عنا همي أشخاص ذو إعاقات شديده حياتهم ابتتغير بطريقة كتير بسيطه بس في عنا اشخاص قادرين يعتمدوا ع حالهم اكتر وقادرين ينخرطوا بالمجتمع بطريقة أفضل.
في صعوبات بتواجها المؤسسة كتغير حياة هؤلاء الاشخاص بس المؤسسة بتحاول تعطي فرصه للاشخاص ليكونوا منتجين وفعالين وقادرين يعتمدوا على نفسهم ويكونوا جزء من المجتمع بقدرات كتير بسيطة.
هل تساعدكم الحكومة ؟ وكيف يتم تمويلكم هل هي بالأمل؟
المؤسسة معظم دعمها من مؤسسة هولنديه الأًصل ومعظم الدعم بيجي من مؤسسات وكنائس هولنديه، في عنا مؤسسات تانيه بتساعدنا في مشاريع، بس القسم الاكبر هولندي.
الحكومة الفلسطينية بتساعد على شراء الخدمه ابتعطينا 900 شيكل عن كل شخص شهري في البيت الداخلي فقط بسبب الظروف المالية التي تمر فيها الحكومه الفلسطينية في تأخير بالدفع ولكن احنا دائما امنطمح يكون الوضع الحكومي احسن ويساعدونا بقدر اكبر .بس في تواصل كبير على المستوى المعنوي بين المؤسسة والمؤسسات الحكومية من خلال المحاوله في انه نخدم أكتر اشخاص ذوي اعاقة.
لماذا تقومون بهذا العمل؟
أنا بالنسبة الي يعني بصراحه شغلي معهم اجى عن طريق الصدفة، لما بلشت ادرس بالجامعه دخلت علاج وظيفي بس للاسف ما كملت لأني حسيت انه المكان مش مناسب الي فحولت على كلية التربية، بس بعد ما خلصت اكتشفت انه ما في شغل اشتغله فاشتغلت مع مؤسسة ذوي اعاقة برضو في بيت جالا وبعدين مع الخبرة والعمل اكتشفت انه هذا مجالي وانا حابة اخدم في هذا المجال واشتغلت في مؤسسات تانيه ساعدتني كيف آآمن بحقوق الاطفال وقديش بقدر اساعد هدول الاشخاص، يعني هي في البدايه عن طريق الصدفة والحاجه بس هلأ مؤمنه مية بالميه انه هاد هوي مجالي ومش حابه اغير هذا المجال، هذا المجال الي بقدر اساعد فيه مجتمعي.
ما هي امنياتكم لذوي الاعاقه هنا؟
أنا بتمنى وبصلي لهدول الأطفال انهم يحصلوا على حقوقهم كامله وانه يتعاملوا معهم الأشخاص على انهم زيهم زي أي شخص تاني وبصلليلهم انه يحصلوا على حاجتهم الاساسية زيهم زي اي شخص تاني، وبتمنى انه يعيشوا حياتهم بكرامه وحرية ويكون عندهم تسهيلات ليعيشوا معتمدين على حالهم اكتر.
ما هو الموقع الخاص بكم للناس التي تريد دعمكم او السؤال عنكم؟
الزمن يتغير
الكثير من وسائل الإعلام
FILMED OVER BETHLEHEM