راديو الحياة يقابل طوني سمعان من مسرح مستر اوك،

مسرح الأطفال والشباب

• Read in English

• طوني ما هو مسرح مستر اوك؟

مسرح مستر اوك هو مسرح بيستهدف الاطفال وهو من كلمته مستر اوك، بيعني نعم للأطفال، يعني احنا منقول نعم للأطفال في وقت كثير ناس بتقول لأ للأطفال، ابعد من هون، احنا منحاول نقول نعم للأطفال، و احنا هدفنا و برؤيتنا انه نعطي القيمة الحقيقية للأطفال، ومن خلال انشطتنا ومن خلال كل شيء منعمله، التمثيل و الدراما و البرامج المختلفة، احنا منقول نعم للأطفال.

• متى بدأتم و لماذا؟

كنت اعمل في مؤسسة مع الاطفال، ولكن لم يكن لدي اهتمام بالاطفال، ولكن من خلال قصة قرأتها بالكتاب المقدس عن المسيح كيف احب الاطفال، وكيف كان الاهل يجلبون اطفالهم للمسيح، فسألو المسيح ماذا تفعل، ابعدهم من هنا .. ولكن المسيح غضب في هذه اللحضة، وقال لهم دعوا الاولاد يأتون الي ولا تمنعوهم، وحسيت انه اللي عمله اشي رائع و انه احنا كمان لازم نعمل هيك، بأنه نعطي القيمة الحقيقية للأطفال في مجتمع ممكن مش شايفها، منعطيهم الحب اللي بيستحقوه و الفرح اللي بيستحقوه.

• ما هي نوعية القصص والمواضيع التي تحكونها في المسرح؟

من خلال المسرح منحب انوصل كثير رسائل بتفيد الاولاد في حياتهم، في عنا عرض مسرحي اسمه قلبي وجسمي نضيف، عن كيف الواحد يكون نضيف من ناحية النظافة الخارجية و كيف يكون نضيف في سلوكه وتصرفاته، وكمان مسرحية بتحكي "احكي اللي في قلبك" ومنعلم الطفل فيها يشارك اللي في قلبه و ما يخبي اذا واجه اي استغلال واي صعوبة بحياته عشان يلاقي المساعدة. و في كمان مسرحية بتعلم عن المحبة واسمها "المحبة اقوى" واللي بتظهر كيف المحبة اقوى من الشر، وبتخلي حياتنا افضل، وكثير اشياء ومسرحية كمان بتعلم عن الايجابية وكيف لازم نشوف الاشياء الايجابية حتى نعرف كيف نستمر في الحياة.

• هل انت مرحب فيك في المدارس الحكومية؟

احنا طبعا منشكر ربنا انه احنا منقدر نشتغل مع المدارس الحكومية و منقدر نوصل لأطفال من جميع الفئات و منعمللهم شيء يفرحهم، احنا منشتغل مع التربية والتعليم في عروض كلما تتاح الفرصة، ومنوصلهم اشياء حلوة، وبطريقة شهرية او اسبوعية.

• كم هو عدد المدارس التي تزورونها؟

المدارس هي كثيرة، احنا منقدر نزور في كل اسبوع مدرسة او مدرستين، طبعا خلال السنة، يعني ممكن نوصل لـ35 مدرسة او 40 مدرسة عشان عنا انشطة تانية و فئات تانية غير المدراس الحكومية.

• اكيد بتشوفه الكثير من الاطفال؟

طبعا، الاطفال اللي منوصلهم عددهم كثير كبير، منوصل الاف الاطفال، وهذه الفرصة عظيمة.

• كم هو عدد المدن التي تزورونها هنا، وهل تقومون بالتنقل خارج البلاد؟

اتيحت لنا الفرصة نزور الاطفال اللاجئين في الاردن، ونعملهم عرض مسرحي و اكثر من عرض، هي خبرة رائعة ان نقدر نقدم لهم شيء ولو بسيط لنفرحهم، وصلنا لعدد من الاطفال السوريين اللاجئين في الاردن وكانت خبرة رائعة انه نقدر نقدم شيء للأطفال هدول.

• هل بتقوموا بعمل برامج خاصة بأعياد الميلاد والفصح؟

لعيد الميلاد والفصح مناسبة خاصة، منحب نعمل شيء مميز يوصل معظم الطوائف المسيحية وكمان يعطيهم المعنى الحيقيقي لعيد الميلاد والفصح من خلال المسرح وطبعا خلال الموسم بيكون عنا عروض، ومنوصل ل30 او 35 عرض في موسمه.

• في وقتها تكونون مشغولين؟

كثير بكون الشغل مزدحم، وعنا في عروض كثيرة نوصل فيها مناطق وما بتكفي كمان.

• هل تذهبون الى مدارس لذوي الاحتياجات الخاصة؟

طبعا احنا من اهدافنا انه ما ننسى الفئات المهمشة، حتى المعاقين واللي عندهم حاجات خاصة، لأنهم بيستخقوا الحياة، وبيستحقوا يمرحو وبيستحقوا يتعلموا فإحنا كثير منتسهدف ومنحب نوصل هدول الاشخاص المهمشين والمحتاجين في رسالة المحبة، حتى فعلا يمرحو بحياتهم، وتصير حياتهم افضل.

• وبعيد عن الاطفال، هل كمان البالغين بيحضرو اعمالكم ومسرحياتكم؟

احنا طبعا منستهدف الاطفال، ولكن بأعياد الميلاد والفصح بيكون موجودين الاهل، وبتكون فرصة حلوة انهم كمان يسمعوا ويفرحوا مع اطفالهم.

• كم هو عددكم تقريبا؟

الفريق فيه 7 اشخاص، بعضهم متفرغ والبعض نصف مشغولين مثلا في دراستهم او حسب وقتهم.

• هل ادارة المسرح امر مكلف؟

طبعا مكلف في كل النواحي، في معاشات للموظفين، وفي المواصلات مكلف والنشاطات التي تحتاج كثير موارد حتى هدايا واشغال.

• هل ترى بأن الله يقدم يد المساعدة؟

طبعا، لما الله يفرح بشيء، رح يدبر بطريقته ومن خلال الناس اللي بحبو عملنا هم اللي بحبو يشاركو معنا في مساعدة هدول الاطفال.

• هل منقدر نبقى على اتصال في اخر اعمالكم على وسائل التواصل الاجتماعي؟

على الفيسبوك في النا صفحة اسمها مسرح مستر اوك بالعربي و Mr.Ok Theater بالانجليزي، واللي فيها كل شي منعلمه واخبارنا بشكل عام.

• بماذا يشعركم صنع بسمة على وجه الاطفال؟

بالنسبة لنا هذا الشيء بيعطي معنى لحياتنا، لاننا منشوف في مجتمعنا كثير بيتركوا البلاد بسبب الظروف او الوضع الاقتصادي، ما بيشعروا بأمل في هذه البلد، ولكن بالنسبة الي بالعكس، اذا بقدر اعمل شيء في حياة الاطفال وجعل حياتهم افضل، هذا بحد ذاته، بيعطي معنا لوجودي و بيجعلني حابب استمر حتى اشوف اكبر عدد من الاطفال لتصير حياتهم افضل.

• لماذا تقومون بهذا العمل؟

انا بعمل هذا كله فعلا زي ما قلت من خلال القصة اللي فعلا بتركز على حقيقة قيمة الطفل، وهذا اللي منحاول نعمله احنا عشان نشوف حياة افضل للأطفال.

• ما هي صلاتكم للمسرح والاطفال؟

صلاتنا من اجل المسرح هي انه فعلا نشوف كمان فريق عامل اكبر بيحب يشتغل مع الاطفال وشغوف ليشوف الاطفال حياتهم بتصير افضل، وعم تتحسن.

• شكرا طوني.