يعرض الآن

Thunderstruck-Owl City
ﺍﺳﺘﻤﻊ ﻟﻠﺒﺚ ﺍﻟﻤﺒﺎﺷﺮ

صنع الفرق في بيت لحم

العمل مع الصم

Listen In English

راديو حياة قابل لورا حجازين من مؤسسة افيتا في بيت لحم. لورا شو هي افيتا؟


افيتا هي عبارة عن مدرسة للطلاب الي بعانوا من مشاكل سمعية الي بنحكيلهم الطلاب الصم الي بتقوم على تأهيلهم سمعيا ونطقيا.

-
متى بلشت هون كمؤسسة وليش؟
 

المدرسة بلشت في سنة 1971 كل نشاطتها الاكاديمية, بلشت بسبب انه كانت رغبة البابا بولس السادس لما اجا حاج على الارض المقدسة عام 1964 شاف انه في كثير اطفال بواجهوا مشاكل بسبب فقدانهم حاسة السمع وما كان بهديك الفترة حدا يهتم في هدول الطلاب فطلب من الرهبنة تبعنا اذا في امكانية نفتح مدرسة لهدول الطلاب كون الرهبنة من 1840 قائمة في هاد الموضوع وبتساعد الاطفال الصم فعشان هيك الرهبنة تبعنا استجابة لطلب البابا وعملت هاي المدرسة للطلاب الصم عشان تأهيلهم السمعي والنطقي بالاضافة الى تعليمهم الاكاديمي.


- شو هي نسبة الناس المصابة بالطرش هون في فلسطين؟

الاحصائيات مش ثابتة بتتغير كل فترة وفترة اجمالا بحكوا 2% من كل مجموعة الاعاقات الموجودة في فلسطين هي البتكون بالدرجة الثانية في اجمال الاعاقات الموجودة

-هل في فرق بالنسب في القرى؟

نعم في المشكلة انه اغلبية الايقاعات بتكون ممركزة في ضمن القرى وضواحي المدن الكبيرة بتكون نسبة الاعاقة فيها اكبر من المدينة نفسها.

-هل هي ضمن النسبة الاعلى في العالم؟

معنديش معلومات وافية انه هل هي انه الاعلى في كل العالم بس انه كمية مش بطالة ولا يستهان بها موجودة هون بفلسطين.

-ليش الطرش مشكلة هون في فلسطين؟

الاغلبية المشاكل لصمم بتنتج بسبب عدة اشياء كثيرة منها زواج الاقارب يعني في عندنا زواج بتم من الدرجة الاولى كمان بين الاقارب واولاد العم من الدرجة الاولى او اولاد العم والخال في مرات كثيرة في عندنا نسبة كبيرة بتكون ل الوراثة ومرات كمان تكون مدمجة بين الوراثة و زواج الاقارب والزواج المبكر كثير بأثر بالاضافة للمشاكل الممكن اتم اثناء الولادة البعدها بس الاغلبية بكون زواج الاقارب والزواج المبكر.

-هل بتشجعي واحد من ابناء العائلة انه ما يتزوج بسبب الاعاقة؟

طبعا, كل ما كان البعد في الزواج بين الاقارب كل ما كان احسن خاصة انه في بعض العائلات بفلسطين معروف انه في عنده مشكلة معينة انه قي كثير بتزوجوا من نفس العائلة او حتى من نفس الجذر تبع العائلة فالمفضل جدا انه يبعدوا في الزواج ما يكون زواج اقارب خاصة انه المجتمع هون بحث على هاي الشغلة.

-هل يتم احترام الناس الصم في المجتمع؟

مرات كثير لا مرات كثير اه حسب احنا عن شو بنحكي وانو مجتمع الاغلبية انه بحاجة لسا مجتمعنا لتوعية اكبر بالنسبة للاعاقات بشكل عام وخاصة بالنسبة للصمم لانه كثير مرات بنشعر انه او بنشوف كمان من حيث خبرتنا وعلاقتنا مع الاطفال انهم بكونوا على هامش المجتمع.

-شو بتعملوا مع الاطفال هون في المؤسسة؟

احنا هون بالمدرسة بنستقبل الاطفال من عمر اقل من 3 سنوات ببلشو عندنا مرحلة التدخل المبكر اللي هي ال Preschool فبيجي الطفل اقل من 3 سنوات بتم تأهيله وتأهيل كمان امه الي عل اغلب بتكون معه موجودة حتى انها هي كمان تكمل شغل المدرسة وشو بتعمل المعلمة تكمل مع الطفل في البيت, وبعدها بنبلش مرحلة رياض الاطفال واللي فيها بتعرض الطفل لبرنامجين: برنامج العادي في المدرسة ضمن مجموعة صفية وبرنامج علاج النطق اللي بكون ساعة كل يوم لكل طفل في رياض الاطفال بحيث انه يقدر يطلع على المرحلة الابتدائية بقدرات كافية تساعده على مواجهة المنهاج, المرحلة الابتدائية بتم اعطاء المنهاج الفلسطيني نفسه زي كل باقي المدارس الموجودة عندنا بفلسطين طبعا بس باسلوب يكون مناسب للاطفال الصم بوسائل تعليمية اكثر بخبرات اكثر انه يتعرض للخبرة كل ما كانت عملية كل ما كانت احسن وبنكمل لحد ما نوصل لسنة التوجيهي اللي فيها بتم تحضير الطلاب حتى يقدروا انهم يقدموا الامتحانات الوزارية زيهم زي باقي الطلاب.

-قديش عدد الاطفال الموجودين في افيتا؟ وهل هم على مستويات مختلفة من الطرش؟

عدد الطلاب الموجودين بالمدرسة من ال Preschool لحد سنة التوجيهي تقريبا بوصلوا ل165 – 170 طالب وهاي امكانيتنا لاستقبالنا الطلاب محدودة بنقدرش اكثر من هيك, واغلبية طلابنا كلهم عندهم صعوبات سمعية بمستويات مختلفة في عندنا اللي بكون مستوى متوسط لشديد لعميق جدا كل الولاد اجمالا بحطوا سماعات للمعينات السمعية وفي عندنا تقريبا 28 – 30 ولد عندهم عملية زراعة القوقعة Cochlear implants.

-شو ممكن يعملوا الاطفال لو ما كانوا هون بالمؤسسة؟

رح يتعرضوا اذا ما كانوا في المدرسة هون انه يتم اهمالهم في المدارس الاخرى لانه لسا مدارسنا مش كثير مؤهلة انها تستقبل ذوي الاحتياجات الخاصة بسبب الاعداد الكبيرة الموجودة في المدارس وكمان فش معلم مساند انه يساعد مع هاد الطفل ف رح يكونوا على الهامش ورح يتطروا انه يعانوا صعوبات ثانية من حيث الاندماج الاجتماعي او حتى كمان في العائلة نفسها.

-بما انكم بتعلموا الاطفال هون, هل بتعلموا الاهالي كمان؟

طبعا المدرسة بتهتم بكل ابعاد الناحية التربوية اللي هم بكونوا الاطفال والمعلمين وكمان الاهالي ف احنا عندنا يوم الجمعة هو يوم الانشطة مع الاهل اللي في بكون ورشات عمل وورشات تثقيفية وحضور حصص مع الاولاد او حتى كمان انه هم يكونوا جزء من اليوم الدراسي لاطفالهم.

-من اي مقاطعات بيجوا الاطفال؟

من مختلف انحاء فلسطين بيجوا اولادنا في عندنا اطفال بيجوا من مدينة بيت لحم وضواحيها والقرى المحيطة فيها ومن الخليل وضواحيها وكمان القرى المحيطة فيها والبعض عدد قليل بس بيجي من الشمال زي في عندنا عائلة من جنين ولكنها مستأجرة في بيت لحم لانه بصعوبة الوصول لمنطقة بيت لحم اختارت انه تستأجر في بيت لحم ليخلصوا اولادها المدرسة و في عندنا عائلة من طولكرم بس هدول عائلة قليلة بسبب الجدار الفاصل وبعد المسافات والمحاسيم صعب عليهم انه ييجوا كل يوم ابعد منطقة من الجنوب بيجوا عندنا من يطا وفي دير سامت وترقومية وغير محلات كثيرة.

-هل يعيش بعض الاطفال هون بالمؤسسة؟

نعم في عندنا احنا قسم داخلي للفتيات فقط لكن هاد القسم بحتوي تقريبا على 23 -24 بنت بيجوا كل يوم الاثنين الساعة 8 الصبح وبروحوا على البيت يوم الجمعة الساعة 1 لانهم بحاجة هم لوقت انهم يقعدوا مع العائلة لان العائلة هي المربي الاول والاخير لاولادهم والمدرسي هي لدعم هاي العائلة البنات بيجوا خلال اسبوع في ناس مربيين كمان بعد الظهر بيهتموا فيهم وبعدين بنعيش حياتنا اليومية كأنه عائلة واحدة.

-هل بيتعلموا الاطفال كيفية قراءة الشفاه هون؟

احنا اصلا المدرسة بتستخدم اسلوب قراءة الشفاة والتدريب السمعي النطقي يعني اسلوبنا هو شفهي لتعليم الصم اللي ما بنستخدم في الاشارة فبنعتمد على قراءة الشفاة انه الطفل بتفرج على شفاه المتكلم معه وهيك بفهم الكلام وفي نفس الوقت هو ينتج الكلام وبقدر يتواصل مع المجتمع الحوله.

مع كل الاعمال اللي بتقوموا فيها هل هاد بزيد من ثقة الاطفال بنفسهم؟

طبعا اكيد لانه احنا من الخبرات ومن علاقتنا مع الاولاد وخبراتنا الحياتية معاهم كثير طلاب بكونوا في البداية ضعاف او خايفين او معندهمش الحياة الاجتماعية بعد ما يتعرضوا للبرامج اللي بنقترحها طبعا بادماج الاهل طبعا في هاي البرامج والمعلمين وكل اشي بطلع عندنا اولاد واثقين من نفسهم اولاد قادرين يروحوا وييجوا لمناطق بعيدة كمان لحالهم يعني في عندنا بعض الطلاب صاروا هلا يروحوا وييجوا من منطقة الخليل لبيت لحم كمان لحالهم مواصلات هاد كثير اشي داعم للاولاد وبعطيهم ثقة كبيرة في نفسهم.

-هل بتخرجوا فيهم للمجتمع؟

اكيد احنا بنحاول قد ما بنقدر انه ندمج المجتمع في تثقيف وتأهيل الاولاد ففي اللحظة اللي فيها بنشوف انه في مكان مناسب او اجتماع مناسب او انه اشي بساعد على تطوير المهارات الاجتماعية للاطفال بنحاول دائما انه اما انه احنا نخرج للمجتمع او ندعوا المجتمع انه يدخل ويكون جزء من بيئة المدرسة.

-هل بحب الاطفال انهم ييجوا هون؟

كثير بحبوا الاولاد انهم يكونوا في المدرسة لانه بس نشوفهم الصبح واحنا داخلين بفوتوا بركضوا والابتسامة على وجهم والضحكة معبية مدرستنا ابدا مش هادية مدرستنا مليانة حياة مليانة اصوات مليانة موسيقى لانه الاولاد هم النغمة اللي فعلا بتعطي حياة للمكان وللمجتمع كله.

-شو بتشعري لما بتيجي هون وبتساعدي الاطفال؟

انا بصراحة كثير مبسوطة اني اكون هون واني اساعد هدول الاطفال لانه بيعطي كمان معنى لتكريسي معنى لوجودي في فلسطين وللحياة اللي بنعطيها لانه بس الطفل الاصم يبلش يفهم ويستوعب المجتمع الحوليه ويعطي بتكون هاي اكبر جائزة واكبر هدية ممكن نشعر فيها ونعيشها كثير رائع.

-ليش بتعملوا كل هاد؟

لانه الحب هو الاشي العلمنا اياه يسوع الاشي اللي احنا في ايماننا بكون هو الطاغي اذا انا بدي فعلا يكون لوجودي معنى وتحقيق ذاتي الحب والعناية بهدول الاطفال اللي هم باعتبار مهمشين في المجتمع بعطي معنى كثير.

-شو صلاتك للاطفال الصم في منطقة بيت لحم؟

بتمنى دايما لهدول الاطفال انهم فعلا مجتمعهم يفهمهم يقدروا انهم يعيشوا شو الرسالة اللي ربنا بده اياه من كل واحد منهم يحققوا ذواتهم ويوصلوا لهم شو برغبوا وشو بدهم بالحياة.

الاكثر من اخبار الحياة

ﻗﺎﺋﻤﺔ ﺍﻟﻤﺮﺍﺳﻼﺕ

اتصل بنا

  • بريد الكتروني studio@radiohayah.ps
  • هاتف (970) 022777019