مجلس شباب بيت ساحور

الشباب يصنعون الفرق

، راديو الحياة قابل باسل ابو عيطة من مجلس شباب بيت ساحور ، باسل احكيلي شو مجلس شباب بيت ساحور؟

المجلس الشبابي في بيت ساحور هو مجلس بضم 13 عضو من شباب بيت ساحور من عمر 18 ل 25 اللي هما يتم انتخابهم على اساس بقدمو خدماتهم للشباب في البلد ويقدموا نشاطات وخدمات وشو بقدرو يقدمو هدول الشباب على اساس نقدر نقدم مساعدات ونقدر نسوي رفاهية في البلد ونسوي نشاطات مختلفة على اساس نساعد ونلم شباب البلد

ايمتى بلشتو كمجلس شبابي ؟

المجلس الشبابي في بيت ساحور بدا في ال 2010 وطبعا كل سنتين بتصير انتخابات لانتخاب مجلس جديد والمجلس في الدورة الحاليو بدا في شهر 9 في ال 2017

كديش عدد الشباب الموجودين في المجلس ؟

احنا كمجلس شبابي في عنا 13 عضو في المجلس

شو هيا نوعية الاشياء اللي بتشاركوا فيها ؟

احنا كاعضاء في المجلس بكون عنا برامج تدريبية برامج ترفيهية وعادة تكون معظمها تدريبية على مستوى القيادة وعلى مستوى التواصل وعلى عدة مستويات منسوي تدريبات مع مؤسسات مختلفة اما بالنسبة للنشاطات اللي احنا منسويهم في عنا نشاطات ترفيهية تعليمية منحاول نقدم مساعدات لطلاب منحاول نقدم مساعدات للبدرسو توجيهي من ناحية محاضرات وما الى ذلك منحاول نعمل نشاطات ترفيهية في البلد على مستوى الشباب وكان في عنا عدة مسابقات السنة السابقة وان شاء الله راح نكون مستمرين خلال السنة الجاي

هل بتساعدوا بتشكيل القرارات في المجلس ؟

عادة ممكن يكون النا راي قي البلدية وبالاخص بالنسبة لاخطاء الشباب ولكن طبعا البلدية عنا عارفة شغلها وبطلعلناش يكون النا دايما رأي ولكن بالنسبة لقطاع الشاب نعم صحيح النا راي والبلدية بتوخد ارائنا

هل صوت الشباب مهم لبلدية بيت ساحور ؟

نعم بلدية بيت ساحور تعطي اهتمام واسع جدا لمجلس الشبابي في بيت ساحور بتورلها ميزانية بتوفرلها شو منحتاج اي نشاط او اي مبادرة منحاول نعملها بتكون بلدية بيت ساحورة جاهزة انها تقدم جميع التسهيلات عشان نقدر نكمل شغلنا

اكيد عندكو اجتماعات مهمة للبلد ولكل هل بتروحوا للشارع وتقدمو مساعدة ؟

نعم صحيح يعني معظم شغلنا هو في المجتمع كل نشاطاتنا بتستهدف مجتمع بيت ساحور وفلسطين ككل طبعا وبالاخص في قطاع الشباب

هل هو اشي مهم امو ينسمع صوت الشباب هون ؟

اكيد صوت الشباب هو اهم صوت في البلد حاليا والشغلة هاي قاعدة بتطور في فلسطين بشكل عام لدرجة انو صار قوى للمجالس الشبابية والمجالس الطلابية في الجامعات وصار في تجمع للمجالس الشبابية يعني احنا منسوي تجمعات مع مجالس شبابية مختلفة حوالين فلسطين كلها وصار تقريبا في اكتر من 40 مجلس شبابي في المدن الفلسطينية وطبعا صوت الشباب مهم جدا و وحدة الشباب في فلسطين مهمة جدا واحنا الشباب لازم نكون مع بعض دايما عشان نقدر نوصل صوتنا للعالم كلو كفلسطينيين

هي في كتير شباب في بيت ساحور  ؟

في عنا عدد مش بطال من الشباب والصبايا في بيت ساحور

كيف ممكن الواحد يشارك في المجلس ؟

عشان تشارك في المجلس الشبابي لازم تكون جزء في الهيئة العامة طبعا الهيئة العامة بتقدملها عن طريق البلدية عن طريق طلب عادي مع صورة الهوية في عنا تقريبا 900 واحد في الهيئة العامة بعدها عشان تكون جزء في المجلس الشبابي لازم تقدم لما يعلنو البلدية في انتخابات وبتكون جزء من هذه الانتخابات طبعا التصويت بكون عن طريق الاسماء ويحق لكل شبا وصبية في البلد ينتخب 13 او اقل وفي النهاية اعلى 13 شخص بوخدو تصويت بكون هما البشكلو المجلس طبعا في شوية قوانين على المجلس كيف بدو يتشكل ولكن في الناهية ال 13 الاوالى هما البشكلو المجلس

هل بصحلك تسافر عشان تمثل المجلس الشبابي ؟

على دورتي لحد الحين ما صحلنا نطلع ولكن خلال الدورات السابقة قدرو يطلعوا مؤتمرات وتبادل ما بين بلديتا وبلديات اخرى ونعم صار في زيارة المجلس الشبابي مع بلاد برا

هل بتنظموا مناسبات خاصة ؟

صحيح احنا عادة منسوي نشاطات مختلفة في البلد واخر فترة كان افضل نشاطاتنا هو نشاط كرة السلة اللي شاركنا في مع البلدية ومع النادي الارثوذوكسي اللي هو احد النشاطات العائلي واللي هو من احلى النشاطات اللي صارت في البلد وطبعا احنا شغالين على نشاطات مختلفة وان شاء الله بكون في عنا نشاطات كبيرة في البلد

ليش انتا شخصيا ادخلت في المجلس الشبابي ؟

انا شخصيا حبيت اني اشترك في المجلس الشبابي واكون جزء منو لاني حسيت اني عندي القدرة على هذا الموضوع وبالفعل نزلت في انتخابات وانتخبونا الشباب وصرنا جزء في هذا المجلس وان شاء الله منقدم اللي منقدر عليه

هل بقدر الشباب يساعدو في حدوث تغيير في فلسطين ؟

نعم الشباب هما اللي بقدرو يغيرو في فلسطين صوت الشباب وشغل الشباب هو اللي راح ياثر في يوم من الايام على فلسطين يعني زي ما قلت قبل احنا لازم نكون متوحدين وتوجهنا واحد ووجيد بغض النظر عن اي انتماء ونكون متوحدين لانو الشباب هما اللي راح يغيرو في هالبلد

هل الشباب بشعرو انو في امل هون في الارض في فلسطين ؟

صراحة انا بتوقع بنسبة مش بطالة مش شباب وصبايا البلد اللي عندهم هذا الحب لبلدهم وانهم دايما مبسوطين بوجودهم في هذا البلد ولكن طبعا بسبب وضعنا السياسي ووجود الاحتلال الاسرائيلي اللي مرات بكون في ميول للشباب السفر او الابتعاد عن البلد او الهجرة او يطلع يدرس برا وفش هان شغل وفش اعمال ولكن انا بتوقع انو لسا في البلد شباب وصبايا متشبكين في هذا البلد ومتاملين انهم يطوروا في هاي البلد

هل بساعد المجلس في صنع قادة مستقبل ؟

نعم بتوقع اه لانو الشباب اللي في المجلس من خيرة شباب البلد اللي تم انتخابهم وهما بتعرضوا لورشات عمل ومحاضرات الها علاقة في القيادة ومش بس في القيادة في كتير شغلات مختلفة فتوقع نعم المجلس الشبابي بقوي القيادات في كل شخص في المجلس ومش بس في المجلس بل في كل نشاط بسويه برا يعني جميع اعضاء الهيئة العامة بشركوا في المجلس فبكون الهم جزء ان شاء الله من قيادات البلد في المستقبل

هل بتقوموا بصنع فرق في المجتمع ؟

من خلال شغلنا منحاول كتير نسوي توعية للشباب في البلد وبقدرش اقول احنا منسوي تغيير ولكن منحاول وشو منقدر عليه راح نحاول ونستملر في شغلنا وشو منقدر نقدم في البلد احنا مش راح نقصر باذن الله

شو هي صلاتكم للشباب في بيت ساحور ؟

انا املي من شباب بيت ساحور انهم يضلوا على التشبث بين بض ويضلوا على العلاقات القوية بين شباب بيت ساحور اللي ورثناه من اجدادنا طبعا احنا دائما في عنا العلاقات القوية بين بعض ووجودنا بين بعض دائما وابدا حبنا لارضنا حبنا لفلسطين حبنا لبيت ساحور ومشاركتنا مع بعض في نشاطاتنا والحفاظ على اسم بيت ساحور والحفاظ على علاقتنا والمحبة اللي بيننا وبين بعض فاحنا هاد هو اللي منتمناه انو الجيل القادم من الشباب يخلي العلاقات هاي موجودة

شكرا باسل وشكرا لاستماعكم لبرنامج احدث فرقا وانتا شو بتعمل لحتى تحدث في فرقا في مجتمعك